D-vítamín
D-vítamín er fituleysanlegt vítamín. Það telst bæði vera vítamín og hormón. Húðin framleiðir D-vítamín og líkaminn geymir vítamínið einkum í lifrinni en líka í fituvef og vöðvum.
D-vítamíni er bætt í ýmsa fæðu, s.s. morgunkorn og mjólkurvörur.
Heiti
D-vítamín, calciferol, calcifediol, calcitriol
Uppspretta
Sólarljósið eykur framleiðslu D-vítamíns í húðinni. Þorskalifur, síld, lúða, lax, lýsi, egg og mjólkurafurðir.
Verkun
Stuðlar að vexti og viðhaldi beina. D-vítamín gerir líkamanum kleift að nýta kalk og fosfór til að byggja upp bein með því að auka upptöku kalks og fosfórs frá þörmum.
Notkun - verkun
- Gefið börnum og ófrískum konum til að fyrirbyggja beinkröm (vansköpun beina).
- Til að hindra og lækna beinþynningu og beinkröm.
- Til að koma í veg fyrir kalkskort vegna vanstarfsemi skjaldkirtils.
- Notað í meðferð við psoriasis.
D-vítamín skortur
Skortur D-vítamíns í fullorðnum getur valdið beinþynningu, beinmeyru, vöðvarýrnun og tannskemmdum. Skortur D-vítamíns í börnum veldur beinkröm eða vansköpun beina vegna kalkskorts.
D-vítamín eitrun
Of stórir skammtar af D-vítamíni verða til þess að of mikið kalk (hypercalcaemia) verður til í blóði sem aftur leiðir til hægðatregðu, þunglyndis, slappleika og þreytu. Ef ástandið er viðvarandi geta kalsíumsölt farið út í nýru og valdið nýrnasteinum og nýrnabilun. Einkenni eitrunar eru: Ógleði, lystarleysi, höfuðverkur og niðurgangur. Alvarlegri eitrunareinkenni eru kalkmyndun í mjúkum vefjum líkamans og lífshættuleg nýrnabilun.
Ráðlagðir dagskammtar
Íslenskir ráðlagðir dagskammtar fyrir D-vítamín hafa verið hækkaðir í 15 míkrógrömm (mcg/µg) fyrir 10 ára og til 70 ára aldurs. Fyrir 71 árs og eldri hefur ráðlagður dagskammtur verið hækkaður í 20 mcg/µg. Fyrir ungbörn og börn 1-9 ára er ráðlagður dagskammtur 10 mcg/µg (skv. Embætti Landlæknis, október 2013 -
Upplýsingar um D-vítamín). Almennt er fólki ráðlagt að taka þorskalýsi eða D-vítamínpillur til viðbótar við það sem fæst úr fæðunni. Sérstaklega er mikilvægt að eldra fólk taki D-vítamín til viðbótar við það sem kemur úr fæðunni. Frá 1-2 vikna aldri er ráðlagt að gefa ungbörnum D-vítamíndropa, 10 mcg/µg á dag.
Ungbörn <1 árs* | 10 mcg | 400 AE |
Börn 1-9 ára | 10 mcg | 400 AE |
Karlar 10-70 ára | 15 mcg | 600 AE |
Karlar >70 ára | 20 mcg | 800 AE |
Konur 10-70 ára | 15 mcg | 600 AE |
Konur >70 ára | 20 mcg | 800 AE |
Konur á meðgöngu | 15 mcg | 600 AE |
Konur með barn á brjósti | 15 mcg | 600 AE |
mcg = míkrógrömm (µg), AE = alþjóðlegar einingar (sama og I.U. eða I.E.)
* Frá 1-2 vikna aldri er ráðlagt að gefa ungbörnum D-vítamíndropa (10 mcg/dag).
Aukaverkanir
Engar þekktar nema við ofskömmtun.
Milliverkanir
Sum segaleysandi lyf geta aukið þörf fyrir D-vítamín. Laxerolía og paraffínolía draga úr frásogi D-vítamína.
Frábendingar
Ekki má gefa ungbörnum lýsi og AD-vítamíndropa samtímis vegna hættu á D-vítamín eitrun.
Skoðaðu D-vítamín sjálfspróf frá Prima hér
Heimildir
G. Samuelsson. Drugs of Natural Origin, a textbook of Pharmacognosy 4th revised edition. 1999 Apotekarsocieteten, Stockholm. Bls. 337-338.H.P. Rang, M.M. Dale og J.M. Ritter. Pharmacology 4th edition. 1999 Churchill Livingstone, Edinburgh. Bls. 457-459.
R. Marcus, Agents affecting calcification and bone turnover. Goodman & Gilman´s The pharmacological basis of therapeutics 9th edition. 1996 McGraw-Hill, New York. Bls. 1529-1536, 1549.
H. R. Jóhannesson, S. Ó. Ólafsson. Bætiefnabókin, Handbók um vítamín, steinefni og fæðubótarefni. 1995 Mál og menning, Reykjavík. Bls. 19-22.
www.landlaeknir.is
(Texti uppfærður í janúar 2014 skv. nýjum upplýsingum frá Landlækni um ráðlagða dagskammta fyrir D-vítamín; Jóna Valdís Ólafsdóttir, lyfjafræðingur).