Lyfja hf. gerir samstarfssamning við Parkinsonsamtökin

Mánudaginn 10. júlí skrifuðu Sigurbjörn Gunnarsson framkvæmdarstjóri Lyfju hf. og Reynir Kristinsson ritari Parkinsonsamtakanna undir samstarfssamning.

Samningurinn veitir félagsmönnun samtakanna afslætti í apótekum Lyfju og mun Lyfja ennfremur styrkja Parkinsonsamtökin á samningstímanum með því að auglýsa í blaði og á vef samtakanna.

Parkinsonsamtökin

Parkinsonsamtökin á Íslandi voru stofnuð árið 1983 og er markmið þeirra að:

• aðstoða sjúklinga og aðstandendur við að leysa úr þeim vanda og erfiðleikum sem sjúkdómnum fylgja
• dreifa upplýsingum, veita fræðslu og styðja við rannsóknir vegna parkinsonveiki
• vera vettvangur umræðu um sameiginleg vandamál félagsmanna
• halda reglulega félagsfundi til skemmtunar og fræðslu
• gefa út rit félagsins og halda úti vefsíðu til að miðla upplýsingum og fræðslu

Um sjúkdóminn

Parkinsonsveiki er hægfara hnignun í þeim hluta miðtaugakerfisins sem stýrir og samhæfir líkamshreyfingu. Einkenni sjúkdómsins koma fram vegna skorts á boðefninu dópamíni, sem heilinn framleiðir. Framleiðsla dópamíns minnkar vegna frumudauða í svonefndum sortukjarna (substantia nigra) í miðheila. Þegar einkennin koma fram hefur sjúklingurinn misst meirihluta dópamínfrumanna.

Áætlað er að Parkinsonsgreindir á Íslandi séu um 700. Algengast er að sjúkdómseinkenni komi fram hjá fólki á aldrinum 65-80 ára og talið er að 1% þeirra sem eru 65 ára og eldri hafi sjúkdóminn. Sjúkdómurinn greinist einnig hjá yngra fólki, og eru dæmi hér á landi um fólk á þrítugsaldri með Parkinsongreiningu.

Parkinsonsamtökin eru til húsa í Setrinu, Hátúni 10, 1. hæð og er heimasíða þeirra www.parkinson.is